Internet Signals: A Persistent Challenge | انٹرنیٹ سگنلز، ایک چیلنج

پاکستان کے طول و عرض میں سفر کرنے والے کسی بھی آدمی کے لیے انٹرنیٹ کوریج ایک گھمبیر مسئلہ ہوتا ہے. اگر غائرانہ نگاہ سے دیکھا جائے تو میری معلومات کے مطابق دنیا میں سب سے سستا انٹرنیٹ پاکستان میں دستیاب ہے. اسی پر اکتفا نہیں بلکہ ہر نیٹ ورک کمپنی ایک سے بڑھ کر ایک پیکج دے رہی ہے. چاہے وہ انٹرنیٹ بنڈلز کی شکل میں ہو، کالز کی صورت میں ہو یا میسجز کی صورت میں. لیکن ان تمام تر بنڈلز اور سہولیات سے وہی شخص استفادہ کر سکتا ہے جسے انٹرنیٹ کوریج دستیاب ہو. جس شخص کے علاقے میں موبائل نیٹ ورک ہی موجود نہیں تو پھر اس کے پاس چاہے سو جی بی ہو یا ہزار جی بی، اسے اس سے کیا سروکار؟ کہ جب وہ ان پیکجز کو استعمال ہی نہیں کر سکتا. کہیں پر سگنل کی عدم دستیابی کی وجہ سگنل ٹاور کا نہ ہونا ہوتا ہے، تو کہیں سگنل ٹاور تو موجود ہوتا ہے مگر اسے فعال رکھنے کے لیے کوئی مستقل بجلی کا سسٹم یا پاور جنریٹر نہیں ہوتا. دونوں ہی صورتوں میں صارفین کو پریشانی اٹھانی پڑتی ہے.

سیاحت کے فروغ میں رکاوٹ:

ویسے تو انٹرنیٹ سگنلز کا مسئلہ پاکستان کے بڑے بڑے شہروں میں بھی رہتا ہی ہے. مگر خاص طور پر ان خوبصورت مرغزاروں میں یہ مسئلہ بہت زیادہ ہوتا ہے جو دور دراز سے آنے والے سیاحوں کی توجہ اپنی جانب مبذول کیے رکھتے ہیں. پاکستان کے زیریں علاقے تو زیادہ تر گرم ہی رہتے ہیں اور انسانی آبادی کے پھیلاؤ کے سبب اب ان علاقوں میں قدرتی خوبصورتی بھی تقریباً ماند پڑ چکی ہے مگر اسلام آباد سے آگے جو پاکستان کے بالائی علاقے ہیں وہ آج بھی زمین پر جنت کا منظر پیش کرتے ہیں. مشہور ترین سیاحتی مقامات ناران کاغان فیری میڈوز بابو سرٹاپ وغیرہ جیسے علاقوں میں خوبصورت آبشاریں، فلک بوس پہاڑ اور سرسبز و شاداب زمین دیکھنے کو ملتی ہے. مشکل اور دشوار گزار گھاٹیوں سے ہو کر وہاں تک پہنچنا پڑتا ہے. لیکن سیاح باوجود تمام تر مشکلات کے پھر بھی قدرت کے حسین نظاروں سے لطف اندوز ہونے کے لیے اپنی جان جوکھوں میں بھی ڈال کر جاتے ہیں. مگر وہاں جا کر انہیں احساس ہوتا ہے کہ وہ مکمل طور پر اب قدرتی نظاروں سے ہی لطف اندوز ہو سکتے ہیں، باقی کسی قسم کا دنیاوی رابطہ کرنا ان کے لیے بہت مشکل ہے. کیونکہ ایسی جگہوں پر بہت ہی مشکل سے کوئی ایک آدھ سگنل مل پاتا ہے. 4g اور 3g تو دور کی بات 2g کے سگنلز بھی نہیں آتے. جس کی وجہ سے اگر کوئی سیاح دوسرے سے بچھڑ جائے تو اسے تلاش کرنا مسئلہ کشمیر بن جاتا ہے.

پرائیویٹ ٹیلی کام کمپنیاں:

ان مسائل کی وجوہات میں ایک بہت بڑی وجہ پرائویٹ ٹیلی کام کمپنیاں ہیں جو اپنے محدود وسائل کے ذریعے محدود پیمانے پر رابطہ کاری کی سہولیات فراہم کر رہی ہیں. ان کمپنیوں کے پیش نظر گنجان آباد شہر زیادہ لائق ترجیح ہوتے ہیں. کیونکہ وہاں انہیں زیادہ سے زیادہ مستقل کسٹمر مل جاتے ہیں جو اس کی سروسز سے فائدہ اٹھاتے ہیں. اس کے برعکس اگر وہ سیاحتی مقامات پر بھاری بھرکم خرچہ کرکے سگنل ٹاورز لگا بھی دیں تو وہاں لوگوں کا عارضی قیام ہوتا ہے. مستقل رہائش پذیر آبادی بہت کم ہے. جس کی وجہ سے کمپنی کو مطلوبہ ہدف کے مطابق منافع حاصل نہیں ہوتا. یہی وجہ ہے کہ کمپنی ایسی انویسمنٹ نہیں کرنا چاہتی جس سے اسے نفع کے بجائے نقصان ہو. پاکستان کی تقریباً تمام ہی ٹیلی کام کمپنیاں پرائیویٹ ہیں. سرکاری طور پر ایسی کوئی کمپنی نہیں جو مکمل اختیار کے ساتھ سرکاری سطح پر کام کر سکتی ہو، کیونکہ پہاڑ کی چوٹی یا پہاڑی علاقے میں کسی ہموار جگہ تلاش کرکے وہاں ٹاور لگانا لوہے کے چنے چبانے کے مترادف ہے. اس لیے اب تک سیاحتی اور دور دراز کے مقامات پر سگنلز کی دستیابی ایک ایسا خواب ہے جو شرمندہ تعبیر نہیں ہو سکا ہے.

حکومتی ذمہ داری:

میں یہ سمجھتا ہوں کہ حکومت پاکستان کی ذمہ داری بنتی ہے کہ پاکستان کے طول و عرض میں انٹرنیٹ سگنلز کی فراہمی کو یقینی بنائے تاکہ اگر کوئی سیاح یا مقامی شخص سفر پر نکلے تو اسے راستے میں کسی قسم کی دشواری کا سامنا نہ کرنا پڑے. خصوصاً ایسے سیاحتی مقام، جہاں غیر ملکی سیاحوں کا آنا جانا بکثرت ہوتا ہے، ان مقامات پر نیٹ ورک کی دستیابی کو یقینی بنانے کے لیے اقدامات کیے جائیں. جہاں پہلے سے نیٹ ورک سسٹم باقاعدہ موجود ہے وہاں بجلی کی فراہمی کو یقینی بنایا جائے تاکہ آنے والے مہمانوں کو آپس میں رابطہ کرنے میں کسی قسم کی دشواری نہ ہو. پاکستانی مہمان نواز قوم کے طور پر دنیا بھر میں مشہور ہے اور مہمانوں کا اعزاز و اکرام کرنا، ان کا خیال رکھنا یہ ہماری روایت بھی ہے. ہمیں اپنی اقدار و روایات کی پاسداری کرتے ہوئے اپنے مہمانوں کا خیال رکھنا چاہیے تاکہ پاکستان میں سیاحت کو بھی فروغ ملے اور لوگوں کو بھی سہولیات ملیں.