Alma piroqu

Payızın tutqun havalarını, yağışlı günlərini sıxıntısız keçirmək üçün vasitələr çoxdur.Mənim üçün bunlardan biri də alma piroqudur.
Alma piroqunu istənilən fəsildə bişirmək olar, amma nədənsə mən daha çox payızda bişirirəm, yəqin şüuraltımda bununla bağlı nəsə var.
Alma piroqunun müxtəlif reseptləri var, çoxunu sınamışam. Keçən payız bişirdiyim reseptı bu il dəyişdim. Yenisi mənim daha çox xoşuma gəlir, indi resepti yazacam. Bu çox asan və ucuz başa gələn bir şirniyyatdır.

Xəmir: 2 yumurta, 200 qr yağ, 1 st şəkər tozu, qabartma tozu, un, 3 alma.
Yumurtaları qırın, otaq temperaturunda yumşalmış yağ, şəkər tozu ilə qarışdırın. Mən bu qarışığı 10 dəqiqə saxladım ki, şəkər tozu ərisin, xəmirin içində diri qalmasın. Sonra buraya un və qabartma tozu əlavə edib yumşaq xəmir yoğurun. Xəmiri iki hissəyə ayırın, biri böyük, biri kiçik olsun. Kiçik xəmiri buzluğa, böyük xəmiri isə soyuducunun adi gözünə qoyun. Bir saatdan sonra xəmirləri götürüb piroqu düzəltmək olar.

Böyük xəmir listə yayılır, üzərinə nazik doğranmış alma dilimləri düzülür. Sonra isə kiçik xəmiri sürtgəcdən keçirib almaların üzərinə yayın. 180 dərəcə qızdırılımış sobada yarım saat bişirin. Üzərinə şəkər pudrası səpmək də olar.

Bu reseptdən böyük bir piroq çıxacaq, soyuq payız axşamlarında bu piroq həyatınıza kiçik də olsa bir sevinc qatacaq. Ona görə də günü sabah alma piroqu bişirin, evdəkiləri və özünüzü şirin sürprizlə sevindirin.